កម្ពុជានៅក្នុងសង្រ្គាមវៀតណាម
សង្រ្គាមវៀតណាម ត្រូវបានអ្នកប្រវត្តិសាស្រ្តជាច្រើននាំគ្នាដាក់ឈ្មោះថា “សង្រ្គាមឥណ្ឌូចិនលើកទី២” ដោយសារតែសង្រ្គាមនេះមិនមែនកើតមានឡើងតែនៅក្នុងប្រទេសវៀតណាមមួយនោះទេ តែវាបានរាលដាលទៅកាន់ប្រទេសពីរទៀត ក្នុងតំបន់ឥណ្ឌូចិន ហើយដែលធ្លាប់ជាអាណានិគមរបស់បារាំង គឺប្រទេសកម្ពុជា និងឡាវ។ តាំងពីក្រោយសង្រ្គាមឥណ្ឌូចិនលើកទី១ (សង្រ្គាមរវាងវៀតណាម និងបារាំង) កម្ពុជាបានប្រកាសខ្លួនជាប្រទេសអព្យាក្រឹត ហើយអព្យាក្រឹតភាពនេះត្រូវបានទទួលស្គាល់យ៉ាងពេញលេញ នៅក្នុងសន្និសីទក្រុងហ្សឺណែវ ឆ្នាំ១៩៥៤។ ក៏ប៉ុន្តែ នៅពេលដែលសង្រ្គាមវៀតណាមកាន់តែរីករាលដាល អព្យាក្រឹតភាពរបស់កម្ពុជាក៏កាន់តែត្រូវប្រឈមមុខនឹងគ្រោះថ្នាក់ រហូតត្រូវបាត់បង់តម្លៃទាំងស្រុងនៅក្នុងការអនុវត្តជាក់ស្តែង។ បញ្ហាដ៏ធំបំផុត ដែលកម្ពុជាត្រូវប្រឈមនៅក្នុងសង្រ្គាមវៀតណាម គឺការណ៍ដែលពួកវៀតកុងយកទឹកដីកម្ពុជាធ្វើជាទីជម្រក នៅក្នុងការប្រយុទ្ធតទល់នឹងវៀតណាមខាងត្បូង និងសហរដ្ឋអាមេរិក។ កាលពីដំបូង ពួកវៀតកុងបានជ្រៀតចូលមកក្នុងទឹកដីកម្ពុជា ដោយមិនបានសុំការអនុញ្ញាតអ្វីទាំង...
